BARABARA ZILIZOHARIBIWA NA MVUA KWIMBA KUANZA KUTENGENEZWA

Posted on: March 12th, 2020

Geofrey A. Kazaula Mvua zilizonyesha kwa muda mrefu nchini zimepelekea kuharibika kwa miundombinu ya barabara ikiwemo Halmashauri ya Wilaya ya Kwimba ambapo barabara pamoja na Kalavati zimeharibika kutokana na mvua hizo.

Naibu waziri Ofisi ya Rais Tawala za Mikoa na Serikali za Mitaa (TAMISEMI), Mhe. Josephat Kandege amefanya ziara ya kukagua miradi mbalimbali ya maendeleo Wilayani Kwimba mkoani Mwanza na kujionea jinsi mvua zilivyoharibu barabara zinazosimamiwa na Wakala wa Barabara za Vijijini na Mijini (TARURA).

Naibu Waziri Kandege ameelekeza Wakala wa Barabara za Vijijini na Mijini (TARURA) kufanya matengenezo hasa kwa maeneo yaliyoharibiwa sana na kusababisha wananchi kukosa huduma.

Ameelekeza kuwa, ikibidi yafanyike marekebisho Katika bajeti kwa kuhamishia fedha Katika maeneo yaliyoharibika sana ili yaweze kutengenezwa na huduma ziendelee kutolewa kwa wananchi.

‘‘Natoa maelekezo kuwa kipaumbele sasa kiwe katika maeneo yaliyoharibika sana, kama kuna Mkandarasi anaye endelea na kazi taratibu zifanyike ili kwanza awarejeshee huduma wananchi wakati tukisubiri fedha ya matengenezo” amesema Kandege.

Aidha Kiongozi huyo ameshauri kuundwa kwa vikundi vitakavyokuwa vinasimamia barabara na kuangalia barabara hizo ili kuwezesha upatikanaji wa taarifa za barabara kwa urahisi suala litakalopelekea kufanyika kwa matengenezo ya barabara mapema kabla ya kuharibika sana.

‘‘Wakati mwingine barabara inaanza kuharibika taratibu na kwakuwa taarifa zake hazipatikani kwa wakati, barabara hizo hazitengenezwi  kwa haraka na zinakuja kugundulika baada ya kushindwa kabisa kupitika, mimi naamini kuwa kama tungekuwa tunafanya ukarabati mapema tungepunguza gharama za matengenezo na wananchi kupitia vikundi vyao wangeweza kusimamia moja kwa moja barabara zao’’, amesema Kandege.

Naye Mkurugenzi wa Barabara za Vijijini na Mijini (TARURA), Mhandisi Abdul Digaga amesema kuwa, suala la kuundwa kwa Vikundi vya wananchi vitakavyokuwa vinasimamia barabara litafanyika mara tu baada ya kukamilika kwa miongozo na sera mbalimbali zinazohusiana na barabara.

Naye Mbunge wa Jimbo la Kwimba, Mhe. Shaniff Mansoor ameeleza kuwa, kwa sasa wananchi wanashindwa kusafirisha mazao yao baada ya barabara kuharibiwa na mvua na kuomba kuwa matengenezo yafanyike haraka kwa maeneo yaliyoharibiwa sana.