BODI YA USHAURI YA TARURA YARIDHISHWA NA UJENZI WA BARABARA KILOLO

Posted on: July 12th, 2022

BODI YA USHAURI YA TARURA YARIDHISHWA NA UJENZI WA BARABARA KILOLO

Na. Geofrey Kazaula, Iringa.

Wajumbe wa Bodi ya Ushauri ya Wakala wa Barabara za Vijijini na Mijini (TARURA) wakiongozwa na Mwenyekiti wa Bodi Mhandisi Florian Kabaka wamekagua ujenzi wa Barabara ya Kidabaga - Boma la Ng’ombe wilayani  Kilolo mkoani Iringa na kuridhishwa na ujenzi.

Akiwa Wilayani Kilolo katika ziara ya Ukaguzi wa Miradi ya Barabara za “Agri-Connect", Mwenyekiti wa Bodi hiyo, Mhandisi Florian Kabaka ameeleza  kuridhishwa  na ujenzi wa  Barabara ya Kidabaga-Boma la Ng'ombe iliyojengwa kwa kiwango cha lami yenye urefu wa km 18.3.

Mhandisi Kabaka amebainisha kuwa lengo la Serikali kupitia TARURA ni kuhakikisha barabara za vijijini zinaboreshwa  ili kuwezesha wananchi kusafirisha mazao yao kwa urahisi na kukuza uchumi wao.

''Tumekagua mradi huu hapa Kilolo na kujionea kazi nzuri iliyofanywa na TARURA, mradi umekamilika na sasa wananchi watatumia muda mfupi kusafiri na kusafirisha mazao yao,” alisema Mhandisi Kabaka.

Kwaupande wake Makamu Mweyekiti wa  Bodi hiyo, Bibi Julieth Magambo amesema kuwa uchumi wa wananchi unategemea Barabara na hivyo Serikali itaendelea kuboresha barabara za vijijini ili wananchi waweze kuzifikia huduma za kijamii kwa urahisi na kuboresha uchumi wao.

Aidha alieleza kuwa ni jukumu la Bodi kuzisimamia barabara hizo na kumuunga mkono Rais Samia ambaye ameamua kwa dhati kuhakikisha kuwa barabara za Vijijini zinafunguka na kuwafikia wananchi ili ziwaunganishe na miji na kurahisisha usafiri na usafirishaji.

Naye Mkurugenzi wa Barabara TARURA, Mhandisi Venant Komba amesema kuwa  TARURA inaendelea na ujenzi wa Barabara ikiwa ni pamoja na kufungua barabara mpya ili kuwezesha wananchi kuyafikia maeneo haliyokuwa hayafikiki.

Mkoa wa Iringa ni miongoni mwa Mikoa miwili inayotekeleza miradi ya ujenzi wa barabara za Lami “ Agri-Connect “ chini ya ushirikiano wa Serikali ya Tanzania na Jumuiya ya Ulaya.

Mradi huu unalenga kuwasaidia Wakulima vijijini kuimarisha Mnyororo wa thamani ya Mazao yao hasa mazao ya Chai,Kahawa,Mbogamboga na mazao mengine yanayohitaji kusafirishwa kwa haraka toka Mashambani hadi Viwandani na Sokoni.