TARURA WILAYANI LIWALE YATEKELEZA MIRADI YA AHADI ZA VIONGOZI

Posted on: December 10th, 2020

TARURA WILAYANI LIWALE YATEKELEZA MIRADI YA AHADI ZA VIONGOZI 

Na. Thereza Chimagu.

Wakala wa Barabara za Vijijini na Mijini (TARURA) katika Halmashauri ya Wilaya ya Liwale mkoani Lindi, umetekeleza miradi ya Ahadi za Viongozi kwa kukamilisha ujenzi wa Barabara kwa kiwango cha Lami zenye jumla ya urefu wa Kilomita 0.779.

Akizungumza wakati wa ukaguzi wa miradi hiyo, Meneja wa TARURA Halmashauri ya Wilaya ya Liwale, Mhandisi Livingstone Shija alieleza kuwa utekelezaji wa miradi ya Ahadi za Viongozi umekamilika kwa asilimia 100 baada ya ujenzi wa barabara kwa kiwango cha Lami ya Wamo-Soko la Zain Km 0.31, Sanabu-Mangota-Mponda Km 0.329 na Mchanda Guest-Ngosha Butcher Km 0.14 kukamilika na kuanza kutumika.

“Hapo awali wananchi walikuwa wanapata shida sana na barabara hizi ikiwemo vumbi, matope na maji kujaa, lakini baada ya utekelezaji wa mradi huu wananchi wameanza kunufaika na barabara hizi na wanaendelea kufanya shughuli zao za maendeleo bila usumbufu wowote”, alisema Mhandisi Shija.    

Mkazi wa Lindi Bw. Silaji Abdallah ameishukuru Serikali kwa kutengeneza barabara hizo kwa kiwango cha lami ambapo ujenzi wa barabara hizo umesaidia kupunguza kero ya vumbi na maji kujaa katika barabara.

‘‘Tunashukuru Serikali kwani barabara ni nzuri na mazingira yanapendeza, pale mwanzoni tulikuwa tunapata usumbufu mkubwa hasa sisi tunaofanya biashara zetu eneo la sokoni kwani kipindi cha mvua maji yalikuwa yanajaa sana kutokana na kutokuwa na mifereji, lakini kwasasa maji yanapita kwenye mifereji na tunafanya biashara zetu kwa raha bila usumbufu, alisema Bw. Abdallah.

Aidha, mbali na utekelezaji wa miradi ya Ahadi za Viongozi, TARURA Halmashauri ya Wilaya ya Liwale imetekeleza mradi mwingine wa barabara kwa kiwango cha lami yenye urefu wa mita 546 ambayo imewekewa mitaro na makalavati na pia kuna mpango wa kutekeleza mradi mwingine wa ujenzi wa barabara kwa kiwango cha lami yenye urefu wa mita 450.

Wakala wa Barabara za Vijijini na Mijni (TARURA) Halmashauri ya Wilaya ya Liwale unaendelea na utekelezaji wa miradi mbalimbali ya matengenezo ya barabara, madaraja na vivuko ili kuongeza shughuli za uzalishaji na kukuza uchumi kwa wananchi wa Wilaya hiyo.