TARURA YAADHIMISHA SHEREHE ZA MUUNGANO KWA KUSIMAMIA UTEKELEZAJI WA ILANI YA CHAMA CHA MAPINDUZI

Posted on: April 27th, 2018

Na: Afisa Uhusiano Tarura, Dodoma

Kumekuwa na changamoto nyingi katika usimamizi wa barabara zilizokuwa chini ya Mamlaka za Serikali za Mitaa. Kutokana na changamoto hizo Chama cha Mapinduzi kialiamua kuingiza uanzishwaji wa Wakala wa Barabara Vijijini na Mijini kwenye Ilani ya Uchaguzi ya mwaka 2015 kifungu cha 39 (a) (iii) kuwa na chombo kitakachosimamia Barabara hizo na hivyo kutatua changamoto zilizopo.

Serikali ilianzisha rasmi Wakala wa Barabara za Vijijini na Mijini (Tanzania Rural and Urban Roads Agency-TARURA) kwa Sheria ya Wakala wa Serikali Sura ya 245 na kutangazwa rasmi katika Gazeti la serikali Na. 211 la tarehe 12/5/2017 na kufunguliwa rasmi mnamo tarehe 2/7/2017 na Mheshimiwa Waziri Mkuu Mh. Kassim Majaliwa Kassim (Mbunge).

Serikali inayo matarajio makubwa kwa Tarura katika kusimamia barabara zilizo chini ya Mamlaka za Serikali za Mitaa “District Roads” kwa ufanisi kama zinavyotafsiriwa kwenye Sheria ya barabara Na. 13 ya mwaka 2007 kifungu cha 12 (3) (a)-(c).

Wakala umechukua majukumu ya kiutendaji kuhusiana na ujenzi na matengenezo ya matandao wa barabara za vijijini na mijini ambayo yalikuwa yakitekelezwa na Mamlaka za Serikali za Mitaa. Hivyo, Wakala unayo mipango ya kimkakati katika kutatua changamoto za barabara zilizokuwepo huko nyuma na kuhakikisha barabara zote (Community Roads, Collector Roads and Feeder Roads) ambazo zinaunganisha Wilaya, Kata na Vijiji zinaboreshwa.

Mtandao wa barabara za Mamlaka za Serikali za Mitaa kwa mujibu wa takwimu za barabara hadi kufikia tarehe 31 Machi, 2018, mtandao wa barabara za Serikali za Mitaa ni kilomita 108,942.2 ambao ni zaidi ya nusu ya barabara za kitaifa (National Roads). Kati ya hizo kilomita 52,000 tayari zinatambulika kisheria na kwa sasa uhakiki unaendelea ili mtandao wote utambulike.

Tarura inasimamia utekelezaji wa miradi ya maendeleo ikiwepo miradi ya matengenezo ya barabara ambazo zinatekelezwa kwa kutumia fedha za mfuko wa barabara (Road Fund), miradi ya kuondoa vikwazo katika barabara (Removal of Road Bottlenecks Program) inayofadhiliwa na Shirika la maendeleo la Uingereza (DFID), miradi inayofadhiliwa na Jumuia ya Umoja wa Ulaya (EU), miradi inayotekeleza mpango wa uongezaji wa thamani ya mazao kwa kukarabati miundombinu ya kilimo ikiwemo barabara, magala na masoko vijijini (Market Infrastructure Value Addition and Rural Finance-MIVARF), MIVARF inafadhiliwa na Benki ya Maendeleo ya Afrika (AfDB) na program ya ‘FEED FOR FUTURE’ mradi ambao unafadhiliwa na Shirika la Misaada ya Watu wa Marekani.

Barabara za Tarura zinachochea uchumi wa mwananchi mmoja mmoja, hivyo kuinua uchumi wa Taifa wenye misingi imara. Barabara hizi zinachochea Kilimo katika ngazi ya jamii pamoja na kuongeza thamani ya mazao katika masoko, pia zinaboresha ufikiaji wa huduma za kijamii kama vile afya, shule, maji na masoko, hivyo kuwa na jamii imara kiafya kiakili na kiuchumi.