TARURA YAANZA UJENZI WA DARAJA LA MWASANGA

Posted on: March 7th, 2022

TARURA YAANZA UJENZI WA DARAJA LA MWASANGA

Wakala wa Barabara za Vijijini na Mijini (TARURA) umeanza ujenzi wa daraja la Mwasanga linalounganisha Kata za Mwasanga, Tembela na Mwakibete jijini Mbeya.

Meneja wa TARURA Mkoa wa Mbeya, Mhandisi Wilson Charles alisema ujenzi wa daraja hilo utakaogharimu Shilingi Bilioni 1.4 unatarajiwa kukamilika katika kipindi cha miezi sita na amewataka wananchi kutoa ushirikiano kwa mkandarasi.

“Fedha kwa ajili ya mradi huu tulishaletewa na Serikali na kilichobaki sasa ni ujenzi ambao tayari umeshaanza kama mnavyoona, tutasimamia ili kuhakikisha unakamilika ndani ya muda uliopangwa,” alisema Mhandisi Charles.

Diwani Kata ya Tembela, Frank Mwasyoke ameishukuru Serikali kupitia Wakala wa Barabara za Vijijini na Mijini - TARURA kwa ujenzi wa daraja hilo ambalo litakuwa mkombozi kwa wananchi wa Kata ya Tembela, Mwasanga na Mbeya vijijini kwa kuimarisha shughuli za kiuchumi na za kijamii.

Naye Mkazi wa Kata ya Tembela, Bw. Joseph Mpole ameishukuru Serikali kwa kuanza ujenzi wa daraja hilo ambalo walikuwa wanapata shida kuvuka baada ya kuvunjika lakini kukamilika kwa ujenzi wa daraja hilo kutawasaidia katika  kusafirisha mazao yao na kuzifikia huduma za kijamii.