WAKAZI WA JIJI LA MWANZA NA HALMASHAURI YA MANISPAA YA ILEMELA WAANZA KUTUMIA MFUMO WA KIELEKTRONIKI WA MALIPO YA USHURU WA MAEGESHO (TARURA e-PARKING)

Posted on: May 2nd, 2019

Wakazi wa Jiji la Mwanza na Manispaa ya Ilemela tarehe 02/05/2019 wameanza rasmi kutumia mfumo mpya wa Kielektroniki wa malipo ya ushuru wa maegesho (TARURA e-PARKING) ambao unatumia mfumo wa Kielektroniki wa malipo ya serikali yaani Government Electronic Payment Gateway (GePG).

Baada ya serikali kutoa maagizo kwa taasisi za serikali kuhakikisha ifikapo Juni mwaka huu ziwe zimeshajiunga kwenye mfumo wa malipo wa serikali kwa njia za kielektroniki (GePG) ili kutimiza matakwa ya sheria ya Fedha za Umma Sura ya 348, Wakala wa Barabara za Vijijini na Mijini (TARURA) umezindua mfumo wa Kielektroniki wa malipo ya ushuru wa maegesho kwa vyombo vya usafiri na moto (TARURA e-Parking) kwa wakazi wa Jiji la Mwanza na Manispaa ya Ilemela.

Lengo la TARURA kutumia mfumo wa Kielektroniki ni kuongeza ufanisi wa ukusanyaji wa mapato ya serikali ili kuboresha miundombinu ya barabara za vijijini na mijini.

Mfumo huu (TARURA e-PARKING) ni rahisi na salama ambapo mtumiaji wa maegesho yaliyo kwenye hifadhi ya barabara za TARURA anapaswa kulipia maegesho kwa kutumia simu yake ya mkononi, benki au wakala na pesa atakayolipa inakwenda moja kwa moja kwenye akaunti ya serikali.

Faida ya kuanzisha na kutumia mfumo huu utampunguzia mtumiaji wa maegesho kero ya kudaiwa ushuru wa maegesho na kufungiwa chombo chake cheni, kwani mtumiaji atalipa mwenyewe kwa kutumia simu yake ya mkononi, wakala au benki. Pia faida nyingine utasaidia kuboresha mipango ya barabara na kupunguza changamoto za maegesho yaani “parking”.

Malipo yanafanyika kwa njia mbili; Kwanza unatakiwa upate kumbukumbu namba ya malipo ambayo utaipata kwa kubonyeza *152*00# kisha fuata maelekezo. Utachagua namba 4 (Nishati na Usafiri), utachagua namba 2 (TARURA e-Parking), utachagua namba 1 (kulipia maegesho), Ingiza namba ya chombo, chagua mkoa, chagua eneo la maegesho, chagua aina ya chombo. Kisha utapokea ujumbe mfupi wenye kumbukumbu namba na kiasi unachotakiwa kulipia maegesho.

Hatua ya pili baada ya kupata kumbukumbu namba (control number) unalipia maegesho kwa kutumia mitandao yote ya simu T-Pesa, M-Pesa, Airtel Money, Tigopesa, Halopesa, Ezypesa unalipa kwa wakala yoyote au kwa kutumia tawi lolote la benki.

Ukitaka kujua unadaiwa maegesho bonyeza *152*00# kisha fuata maelekezo. Utachagua namba 4 (Nishati na Usafiri), utachagua namba 2 (TARURA e-Parking), utachagua namba 2(angalia deni).

Malipo ya maegesho ni kwa siku lipia maegesho kabla ya saa sita usiku, lipia maegesho kuepeuka faini isiyo ya lazima.

Mkazi wa Jiji la Mwanza na Manispaa ya Ilemelea sasa malipo ya maegesho ni kiganjani mwako.

Imetolewa na:

Bebi Kapenya

PRO-TARURA